Təhsil Nazirliyi ilə müqavilə çərçivəsində ali və ümumi təhsil müəssisələrinin, peşə məktəblərinin ümumilikdə 1600 nəfər müəllimi üçün keçiriləcək İKT təlimlərinə hazırlıq mərhələsi başa çatmışdır. Belə ki, bu məqsədlə 43 nəfər təlimçiyə  Təhsildə İnnovativ Texnologiyalar Əlavə Təhsil Mərkəzi tərəfindən master klas keçirilmişdir. 

 

Komandamız master klas müddətində İKT-nin təhsildə tətbiqi üzrə SAMR, “Shake Up Learning” modeli və dinamik öyrənmə mühitinin təşkili ilə bağlı məlumatlar əldə etdilər, müəllim və şagirdlərdə XXI əsrin əsas bacarıqlarından olan sərbəst və ömür boyu öyrənmə mühitinin müasir texnologiyalar əsasında formalaşdırılması üçün, Təhsil Nazirliyinin təşəbbüsü ilə 2019-cu ildə yaradılan beynəlxalq Open edX platforması üzərində qurulmuş Sərbəst Öyrənmə Portalında qeydiyyatdan keçdilər, orda mövcud olan kursla tanış oldular, həmçinin yeni kurs yaratmaq üçün praktik bacarıqlara yiyələndilər. Daha sonra, şagirdlərin maraqlarına cavab verən təlim prosesinin qurulması üçün öyrədici mobil tətbiqetmələrlə və yeni təhsil trendi olan AR (Augmented Reality), VR (Virtual Reality) ilə tanış oldular. Master klasın son günü təlimçilərə hesablama düşüncəsinin, yaradıcı təfəkkürün inkişafına yönəlmiş, eyni zamanda layihə əsaslı öyrənməni və BMT-nin Dayanıqlı İnkişaf Məqsədlərini dəstəkləyən beynəlxalq PolyUp platforması və təlim/tədris prosesində müəllimlərdə/şagirdlərdə yaradıcı təfəkkürü inkişaf etdirən təxəyyülyönümlü təlim üsulları haqqında məlumat verildi.